Phili 1 | WSK | STEP | Ani Paul, ani Timothy ilak Jesus Kristus ko ura kari, bare tam gawa imi bataguru nina Kris alo Philippi bagasan, se ninga supuling alo, se ura saonga kari alo suen la ningarsan.

Philippians 1

Den gira

1 Ani Paul, ani Timothy ilak Jesus Kristus ko ura kari, bare tam gawa imi bataguru nina Kris alo Philippi bagasan, se ninga supuling alo, se ura saonga kari alo suen la ningarsan.

2 Anananga Nainet Kaem, nanga Biya Jesus Kristus ilak, nunga nongomang yawara, se nunga lila ningarmon se te bagaralko.

Paul Philippi Kris alo nunga amilmilaram ale Kaem amilmil tuam

3 Tom suen biya ani nina nego ko angamin tugusam, mu ani aga Kaem amilmil tusam. 4 Ale tom ani nina suen la nego ko ngatangasam, mu ani amilmil ago la ngatangasam. 5 Mu awuk, nina duap te nunguning se tai aitakta imi te, nina ani agarak den gilalong yawara ko ura ilu lagaman. 6 Se ani ninguru ikisam, Kaem ninga ningi ura ningo duap beteram taiwoso, mu bitiruk nama Jesus Kristus tairukko tom mu te menawu sapurukko.

7 Aninga angamang nina nego ko amilmil biya. Se umutang munan diram. Ani ninguru ninga kuesam. Mu awuk, Kaem gomang aisam ale ura aisam imi te nina aga sangaru lagaman. Ani aitak talipara ningi bagasam imi te, se tom ani me aga talipara la, ani den gilalong yawara apu se sokel ago anirukko la sail tagikasam tom mu te betela, nina aninga sangarukasan. 8 Kaem ikiwoso se ani balsam, aninga angamang nina nego ko biyala niaso, se Jesus Kristus ninga kueso iwitatala ani ninga kuesam.

9 Ale ani iwita Kaem aru ngatangorsam: nu ninga sanguk se nina ninimi ko ninguru kueralko. Ale ikia ningo se sinar ago la bagaralko. Se munan mu eng biyala laga sapuruk ale anirukko. 10 Umutang te nina munan aguwaya mu ningo nunguningkiri mu ko ikial ale eng memek bo mena, yawarakala te bagaral se Kristus tairukko. 11 Nina Jesus Kristus sokel ningarso mu te, munan ningo diram la te bagaral se mu te Kaem nup biya taukko.

Paul talipara kawam ningi bagakaso

12 Aga singsang alo, ani nina ikialko ninga manorsam, ani talipara ningi bagasam imi mu, den gilalong yawara koma me kaolam, mena, am sokel tuam se biyala namawoso. 13 Se Caesar ko kawam ko kager kari suen la, se kari saki agotala, ani Kristus ko nup ko talipara ningi bagasam mu ko aga ikiman. 14 Se mu la mena. Ani talipara ningi bagasam mu te nanga Kris launuria suen biya tala nongomang sokel tam, se Kaem ko den mu nguangara mena, am sokel ago balsan.

15 Mu nunguningta, saki ani aip ago mu ko nongomang magoso, se nongota nunup patawomonko Kristus ko dugu duap balsan. Bare saki mu nononga ikia ningo se noko dugu duap balsan. 16 Mu awuk, nuna aninga kuesan, ale nuna ikisan mu ani den gilalong yawara sokel ago te anirukko imi te bagasam. 17 Bare saki alo nuna nongota nunga nunup patawomonko Kristus ko dugu duap apusan, mu nongomang ningi nunguning te mena. Nuna ani talipara ningi bagasam se ikup sang agotala aisimonko kua gilingisan. 18 Bare mu mel yam. Nunga ikia diram agi, sang diram mena, bare nuna Kristus ko dugu duap balsan, se ani mu ko amilmilasam.

Ale ani am amilmilawirikko.

19 Mu awuk, nina ani ago ko ngatangasan, se Jesus Kristus ko Korang Bur aga sangaruwoso, buta se ani ikisam, ani (...) yawarakala bagirikko. 20 Aninga ikia angamang biyala mu ani me nguangirik dolirik, aitak se tom suen biya am sokel ago la bagirik, ale kuerik agi bagirik agi, bare aga bagara te, aga namara taira te, Kari Biya nup biya tuekko. 21 Tom ani marak bagasam mu ani Kristus ko la bagasam. Se ani kuerik mu eng yawarakala nunguningkiri. 22 Ani am bagirik mu, aninga ura am bitawirik se nunguning kapurukko. Bare kuerik agi mu ningo tala.

Se ani awuk bore ko balik? Ani me ko ikisam. 23 Ani angamang ilagala se kusumuri bagasam. Ani kuerik ale namirik Kristus ilak bagirikko mu ko angamang biyala aniso, umutang yawarakala nunguningkiri. 24 Bare ani ali imi te am bagirik mu, nenenga ningo ko yawarakala tala. 25 Ani umutang ko ninguru ikisam. Buta se, ani ikisam, ani am baga se nina suen la ninga sangik, ninga nengemang ningi nunguning mu nama aurok se nina amilmil ago bagaralko. 26 Se ani udagi aking nengete namirik, mu nina ani ago ko amilmilaral ale Jesus Kristus nup patowaralko.

Ana sokel ago la den gilalong yawara ko kagernakko

27 Bare mel biya mu ninga bagara aolak Kristus ko den gilalong yawara karogo terong mam mu te la bagaralko. Se ani tairik ningarkik agi, am ninga den la ikiek agi, mu ani iwita ninga ikiekko, nina suen la nengemang suwanta sokel ago sanamiwasan, ale ikia suwanta den gilalong yawara ana ko nangamang ningi nunguning aram mu ko sail tagisan. 28 Ale saki ninga bita maguwusan mu me nunga nguangasan, am nengemang sokel ago bagasan, uwutata ninga ikiekko. Nina uwutata bagaral, mu kari nengerak betesan mu wetang te ikimon, nuna mu memek tamonko, bare nina mu Kaem kota ninga giok se yawarakala bagaralko. 29 Ikialko. Kaem gomang ningaram ale munan ningo ilagala imitang nina te Kristus nup patowaralko mu ningaram: mu nina Kristus ko nengemang ningi nunguning arukko mu la mena, nina noko / Kristus ko nup ko ikup ago talko. Mu awuk, nina ani agarak wete kager ko sanamaman ale ikup giwasan. Kager borta ani ulengkala te bagakasam mu nina (OK to add aringiman?) ko ikiman, ale aitak am te bagasam mu nina ko ikiwasan. ^{▼▼Phil 1:28-20 Ikup gia ko den: Mat 5:12; Acts 5:41; 14:22; 16:22-23; 2 Thes 1:5-8.}

30